قصائد بصوت عباس جيجان

أرثيك يا عراق


اخي الشهيد


أمي الحنونه


رسالة الي فخامة الريس اوباما


غزة


العراق


الارقام


جواز


رثاء البطل


يا شعب العراق شبيك


يوسف


يا حمام الدوح



وطن مبيوك


منت بعيد

سياستنا

بس احنا سياستنا ذبح وارهاب من الباب للمحراب

فضائيات عدنا بقد عواء الذيب طاحوا لك علينا بين طيب وطاب

وتيارات عدنا بقد نفوس الصين ومن كثر القصب والبردي عدنا احزاب

ياهو اللي تلزمه يقول انا الزين وغيري محيّل وكذاب

باعوه الوطن تفصيخ بالمزاد حمّل شيل غير حساب

هو مو مال ابوهم حتى يبيعوه كل اللي اجوه اغراب

اخوي الكردي يطالب رايد استقلال وحق ابن الجنوب يريد له طلاب

وابن بغداد عايش بس على التفخيخ والتفجير يذبح رقبة الطلاب

ما يقبل علي سنة عمر تنعاب ولا شيعة علي ينكرها ابن خطاب

من الله خلقنا بهل الوطن خوّان سنة وشيعة فد كتاب

ما اقلك تفاخر هذا حكي اليوم بس دقق علينا وراجع الانساب

كلنا من ظهر واحد نسل عدنان لو قحطان ودين اهلي سمح ومشرع الابواب

سوونا طوايف ناس تاكل ناس وسووهة شريعة غاب

مو هذي ثقافتنا وحق الله هذي فكرة الاجناب

اصحوا يا عراقيين كافي النوم مو طب بمحلكم وحطّب الحطاب

المنتخب العراقي

كتبنا لمنتخبنا اشعار ورسمناله على خدود القمر نجمة

وعلى خدود الصبايا العلم خطيناه وعزف ويا القلب نغمة

وهلهولة فرح من زاخو حد الفاو فرحانة الشواطي وهبت النسمة

هذا ابن العراقية التعرفه الناس ما كلّت زنوده ولا تعب عزمه

فك قلوبنا وفوت بيها وشوف تلقى بكل قلب رسمه

هذولة اللي يوحدونا يا ساستنا العراقيين من عدهم تعلم واعرف اللزمه

جيب الكاس صاحولة يا ابن همام خوال تسوم هذولة البيهم الرحمة

وتلقاهم محمد راشد آل مكتوم واحد ما يصير اثنين هذا شما تعد رقمه

هذا خاله الشيخ زايد بيرق العربان ... وابو راشد معدل والكرم عمه

يونس ما كبس لولا قدم هوار ومن نشأت وسطنا يندل المرمى

ونور الحرس مرمانا يا نور العين صد كل القذايف بيده وبجدمه

ضحك وجه الحزينة الدامعة النازفة بغداد ورسم فوق الجرح بسمة

عفية ابن العراقية بطل مقدام ما نام بسفح ... واقف على القمة

فارقنا الفرح واليوم فرحانين مثل فرحة طفل من شاف وجه امه

منهو القالك حنّا العراقيين متفرقين اذا صاح العراق عراقنا نلمه

وشهيد الطاح منّا وشنزف عالقاع ... بس اسم العراق يكتب بدمه

وامة العرب دوم تشيل بينا الراس اذا مات العراق راحت الامة

جمجمة العرب لامة العرب نبراس مثل شم النسيم ترابها نشمّه

من الله خلقنا تمر علينا اهوال بس ابن العراق اهوال ما تهمه

جمع كل الذيول الجاية من بعيد وفرّاهم بكفه وانترس صمه

وطقهم طقة المالوم من يغتاظ وخلّه الزين بيهم يسبح بدمه

يوم العيد

رثاء القائد الشهيد صدام حسين

ويه الفجر

يوم العيد

وي نحر النحور

صدام قدم للوطن روحه

إجه مثل ألأسد مجروح

يمشي وتضحك جروحه

هم شايف جبل ينكاد

وإذا شفت الجبل مكيود

تلكه العله بسفوحه

مثل النخل مات وكوف

شاخص شامخه صروحه

لك لو هيجي الرجال تموت

لو غم الرجال بموت ماصخ مابه ملوحه

بجيت وما بجيت عليك

بجيت على الزمان الضمك بلوحه

بجى حتى الفرات عليك

ونهر دجله إنتحر موحه

إذا ً تستاهل عليك ينوح

شاعر ما بطل نوحه

لأن إنته الوحيد إلذي خليت

المشانق للرجال تصير مرجوحه

رغد يا رغد لا تبجين

بس دمعة حزن للزين مسموحه

أبوج ألكتب إسمه بجبهة التاريخ

كعبه الوطن عنده وعاليه سطوحه

الزمن يشهد لأبو ألليثيت

ولو آنه شهادتي بصدام مجروحه

ما دنك براسه وإنحنى للجلاد

رغم سلسلوا رجله وشدوا جفوفه

رفض يلبس نكاب الموت

وضحك على الموت سنه وعيننه تشوفه

عجل والله يتباهى يسجل التاريخ

عنه وتكتب حروفه

مو حبل العلى الركبه طلع ملفوف

ركبه على الحبل طلعت الملفوفه

إذا ًحقها العرب تحزن عليه وتنوح

وكع خيالها والشمس مكسوفه

من زغره عجيد عنيد وضد الأستعمار

ابوج الوصل سابع جار معروفه

وإذا البصره حزنت مصباح يوم العيد

يم تكريت طلعت تلطم الكوفه

وإجت نينوى محنية ظهر وتصيح

وين ابن الرمادي الباشطه سيوفه

سووها العلوج ودنسوا بغداد

وعاصمة الرشيد اصبحت مجتوفه

إذا ً تستاهل عليك ينوح

شاعر ما بطل نوحه

لأن إنته الوحيد إلذي خليت

المشانق للرجال تصير مرجوحه

الفتاة الهولندية

قالت " دوي " واستوى الما يستوي

ومن تخزرك عين كأنها تقول خنجر ملتوي

والطول طول الخيزرانة وشو كأنها حية ولو مشت تطوي طوي

والخدود تقول جوري والنهد رمان اهلنا وحان وقتك يا حوي

وانا اعد روحي قوي ... من شفتها تخربطت وتبريدت صرت انا والماكو سوي

كلمتها عود مثل الناس " أشت بليف ميشل ميشوي "

سكتت وما جاوبتني دق عليها التلفون الخلوي

اشرت جاوب كلبها وانا ما شايف كلب نبحه عوي " مهجن "

فرغت وردت عليّ " فالي كلانت كوميي ؟ أوتسبراك " حكيك عربوي

جاوبتها " كزخ أوت إراك , ألين فونن , نيت سامن " لا إلي صاحب ولا عندي خوي

وانا امشي " هرد لوبن , ريخ دور " وما عرفت درب اللوي

" فاتيمر " ردت عليّا وكأنها قالت وي عليّ ... وحيدك تعيش ببلدنا وتنزوي

واحنا حتى كلابنا تعيش برفاه ويا البشر عاشوا سوى وسكنوا سوي

شمالكم صرتوا طشاش واحنا ندري ذراعكم ما ينلوي

جاوبتها والخجل ندّى الجبين والدمع مو ماي ... ينزل دموي

انا من بلاد الرافدين العاث بيها الحربوي

وانا من شعب العراق الداخ من كثر الدوي

وانا من شعب التحاصر والتعوق والتأثر بالاشعاع النووي

لا تهيجين الجروح عاد يا بنية ارعوي

ولا تذكريني بهلي وطيبة هواهم ترى الفرقة كوت قلبي كوي

انا عطشان على دجلة ... شما شربت بمايكم ما ارتوي

من ذهب يا لسان

من ذهب يا لسان كلامك يضمن الفضة

وكبيرة السالفة ببغداد خلقك لازم تفضه

اظل كم دوب اغض الطرف هنَّ هواي مل مني الطرف من كثر ما اغضه

مديت الحبل كله على طوله وياك رد مقطوع ثاري الفار كان بعبك يقرضه

مثل الذيب لمّن شاف الية الشاة تسرفن قام يتوضى

اجاكم للحلق مكتوف ومثل جهمة بغل بشعير دنّق نابك يعظه

شيصير الوطن قلي بعد شيصير فخختوه وفجرتوه مثل عبوة حقدكم طار وتشظى

اجينا نلملم اكتاره وطن مجروح يصيح أحاه بوية منين ما اكظه

احتلال وطائفية احزاب تيارات كلها بساحة المذبوح مكتظة

ديمقراطيات كل الناس امان وخير بس احنا احتلال وطائفية ومهزلة وفوضى

عساها ببخت كلمن ساس بيها ودمر شعب العراق ودنسوا ارضه

شيصبر الروح لمّا تشوف جيش الغاصب المحتل يمشي بطوله وبعرضه

لا صارت ولا هي تصير بالقرن الواحد وعشرين يحتل العراق وينتهك عرضه

واحنا القاع منّا تخاف اذا ندبك عليها وثوبنا ننفضه

كم واحد بواحد عال بينا وخاب ورد لامه ذليل مفيّن بحظه

واحنا الهوى بس الهوى نسمح له يمر خشم العراقيين واذا بيه ريح صفرا نسده ونرفضه

قلي شورطك بينا يا راعي الهوش غير الندم عض ابهام ما تحظى

جاي انت على اهل الراي رايد رايك تفرضه

ولك واحنا العراقيين من نغتاظ على امنا وابونا تمر ساعات ما نرضى

حلم

البارحة شفت الوطن بالطيف اجاني البارحه ..

قتله هلا ومية هلا يابو الخيول الجامحه ..

مديت اديه تسالمه شفت القلب قبل الجفوف يصافحه ....

شلونك قلت ياموطني وظنوني ظلت سارحه ..

وانقطع وسطي من الخجل من الخجل وعيوني ظلت شابحه ..

قال اطمأن ياولدي كفتنا هي الراجحه ..

قلته الْيِرد ياموطني لحضنك الدافي تسامحه !! ..

قال اْليِرد وإلْما يِردْ وحتى الْيِفكر بالوطن ذنوبه كلهن طايحه ..

بس الْيِخون اُمّيِتهْ ما يستحق نقرا على روحه الفاتحه ..

قلته يبه ياموطني عندي حجي بغزر الدموع المالحه ..

قال احجي قول شما قلت طبع الوطن مثل الابو واجب عليك تصارحه ..

قتله يبه ياموطني ليش انت من دول الدول صاحت عليك الصايحه ؟؟

وليش انت من دون الدول اطفالك الحلوين بالدم سابحه ؟؟

وليش انت من دون الدول بكل بيت عندك نايحه ؟؟

وليش انت من دون الدول ناسك إتْصبّح نازحه ؟؟

وليش انت من دون الدول جيرانه كلها تواقحه ؟؟

وليش انت من دون الدول يا ثور بالعالم قوي تركض عليه تناطحه ؟؟

متْقلي منهو الْخبلك يا بو العقول الراجحه !! ..

شفته ضحك .. شفته ابتسم لمن حِجى و جاوب اجابه واضحه ..

قال اعتقد يا ولدي .. المشكله مو بالوطن .. المشكله بصدام هو الذابحه ..

يبقى الوطن هو الاصل والناس هي الرايحه ..

كفكف دموعك ياولد ادري بغريب الدار شوقه الجارحه ..

وادري بغريب الدار كل ما يِعتلي وكل ما صعد وشْما كسب خسران كل ما رابحه ..حتى الطيور إلها وطن تهاجر لجل لمن يهزها الشوق ترجع طافحه ..

وحتى النخيل إلها وطن ما تنشتل إلا بأرضنا المالحه ..

بس إحنا نبقى لِشْ وقت يا موطني نحلم وطنا نصافحه ؟؟ ..

وخلاف الوطن تبقى البشر مثل البهايم دايحه ..

والبارحه شفت الوطن بالطيف أجاني البارحه ..

العراق

ما أنت بعيد أنت العين وأقرب من الجفن أنت

وما أنت غريب أنت الوالد اليحضن بيده وليده وبنته

وما أنت وحيد أنت الشعب كله بشيعته وسنته

منهو القالك ناسيك همّ ينسى القمر وقته.. لو نبض القلب يتنكر لدكته

بس عشقك عشق مفضوح وعشق الناس كلها مساتر وسكته

صرت أنت سبت وبرقبة يهودي.. همّ شايف يهودي يجوز من سبته

أنت الفارس اليسبق هبوب الريح وما أظن خيل سابقته

وأنت اللي يرهم ترابك كحل للعين ودوة للماشفت علته

ومن طينك نحني كفوف المعرسين وكل اصبع فرح من طينتك طقته

وأنت الريحة ترابك ترد الروح هيل وزعفران وعنبر بشمته

ومثل تراب قاعك ما لقينا تراب يرهم للصلاة من طينته تربته

أنت أنت ينام بيك المرتضى الكرار أبو الحسنين التلوذ الناس كلها بشارته وبخته

وأنت ينام بيك بكربلاء حسين الما بايع الطاغي ودنّق رقبته

وأنت اللي بيك ظلت شارة العباس لمّن طاح دنق له للفرات وباسه من شفته

من طلعت منك يوم طرني البين قلبي وياي ما جبته

أتاريني نسيته هناك عندك قلبي أمنّته

شتلته بجرف دجلة الخير وي سبّاح الشواطئ شربكت بتّه

وامتدن عروقه بوسط ذيك القاع ومن ماي الفرات ودجلة عمدته

ولمن صار ينقل جدمه بين الناس أخذته وياي للكاظم على الشباك زورته

صح هسه أصبحت من وطن نيدر لاند هولندي الهوية وشعري جللته

وصح تأقلمت ويّ الغرب فدنوب وصرت ماسخ مثلهم والملح عفته

وصح قمت أرطن رطنهم لمّن يرطنون ولسان العرب بالأعجمي كسرته

لكن ما أدري شنهي يصير بيّا من يمر طاريك أحس أنك دفو تموز وسط الشتاء

وتاريني مثل طبع النخل لو طال يرجع للأصول وتنحني شعفته

العالم نسى يوم 11 من أيلول صارت بيك سالفته

ناس تقول لازم نحتويه ونشفط البترول ونعوض الراح ونسرق برقته

وناس تقول لازم هالحصار يدوم وناس تقول لازم ننزع أسلحته

وناس تقول خطيّة أطفاله ماتوا من الجوع.. وناس تقول حيل وياه ما حمد ربه وشاكر نعمته

وأنت بين هذا وذاك صاير شبح لليرمون وياهو القام ضدك سدد تفقته

جي لأنك حلو والدول منا تغار ما عندهم اللي عندك من مجد نلته

أنت أول وطن آدم وضع جدمه عليه وقال يا الله ولأنك وصلة من جنته

وأنت أول وطن حبه النبي إبراهيم ودعا ربه يصونه برحمته وعزته

وأنت أول وطن مرسى لسفينة نوح والنبي أيوب ناخت بيك راحلته

وأنت أول وطن علم العالم أبجدية ويكتب التاريخ.. وأنت أول وطن قانون سننته

وأنت أول وطن قالت له الشمس يمه صباح الخير.. ولو رادت تمسّي تمسي يمّ قبته

وأنت أول وطن ما تشبه الأوطان مدري شلون ربك خالقك ... سبحان ربي شلون صورته

صورته العراق وبس علينا يلوق وإحنا نلوقله لمّن يحل وقته

عراق المال والأبطال كل الناس واصفته

ذوْله أهل الغدر من عندك شيردون ياهو الطاح منهم ما أجو عنده

كان جيبك موش إلك لما العرب ينخوك عزيز المال هيك وهيك طشرته

شو لمّن طحت ما حد إجاك وقال عد عيناك.. وأنت جروحك ينزفن مثل دمع الشمع سكته

وبقيت وحيد مدمي بساحة الميدان وأطفالك عليك بصفك ينوحون.. وأنت تون ولا مثلك قبل مذبوح ون ونته توكيت على جرحك قمت ما اهتميت خاف الشامت يشوفك طريح ويشتفي بشمته

طبع بيك المكابر أكبر من الآه وأكبر من غدرهم يابا أتلفته

كم غازي بغازي اللي مرّ عليك وزال وتكنسه السنين مقبّع بذلته

صفوا بالمزبلة ويلعنهم التاريخ وكل ذوله الغزاة أشخاص راحوا والبقيت أنت

تراب بلادنا يرفض أقدام الأجنبي والغازي والمحتل.. تراب بلادنا بس انبياء الله ساحقته

مدح الرسول

بسم الله اله الكون ربنا الخالق الأحد

وصلى الله على اشرف انبياء الله نبينا المصطفى احمد

وصلى الله على آل الرسول وصحب الرسول الخاتم انبياء الله محمد

محمد ................... محمد

يارحمة لكل انسان عاش بدنيته محدد

محمد يا اعذب نبي يا اشرف نبي ما مات وتخلد

محمد يا نور وجه الله ما بين الخلايق دار وتوحد

محمد يا ابا الزهراء يا شفيع الناس يوم الحامية توقد

محمد ايها المبعوث فينا كلنا بدعواك نشهد

نشهد قبل ما ينخلق آدم ربنا من نوره خلق وجهك محمد

نشهد انك المرسل حبيب الله محمد

محمد كل انبياء الله عدنا نجوم وانت الكوكب الفرقد

محمد انت العقل كله والعلم والراي لا والله وبعد ابعد

محمد انت مو آخر نبي والله انت اول نبي بآخر نبي تجسد

لولا محمد ما عرفنا الله ونصلي الفروض الخمسة نتعبد

ولا صمنا شهر رمضان ولا حجينا بيت الله لا خمسنا لا زكينا لا ازود

محمد يا عدل الاله الساوى كل الناس بين الابيض واسود

محمد صلى الله عليك ويحرسك الرحمن يا اجمل نبي باخلاقه يتفرد

محمد حبيبي وسيدي ومولاي ونفسي الينزل ويصعد

محمد اذا مو الك اكتب قصيدة وامدحك وانخاك بعد المن اروح برايته انشد

محمد يا ابا الزهراء يا جد الحسين السال دمه ودربك تعبد

محمد انت مو بالمدينة تنام لا والله انت بكل قلب موجود الك مرقد

محمد يا احلى اسم مر باللسان ونطق بيه الكون كله وقالها وردد

محمد يا ليلة قدر بيه المولى اسرى بليل ووصل يم الاله وسبح وحمّد

محمد اذا كان الكرم الجود عند الناس كل الناس انت الاكرم الاجود

محمد يا قوس سهم الله على الكافر رمى وسدد

محمد آمنت باسمك عرب واعجام كلها برحمتك تسعد

محمد يا عطر الاله انطش على الاكوان ومن عنده الورد ورّد

محمد يا نور وجه الله من نوره الظلام انزال وتبدد

محمد وآل بيتك طاهرة واطهار حبهم للوقع مسند

محمد والصحابة الصاحبوك سنين سلام الله عليهم دوم يتجدد

محمد يا نبي ومعصوم ومن عنده المكارم تجي وتتولد

محمد ما تمسه النار لا والله كلمن صلى وتنخى بمحمد

محمد ................... محمد

انطيني من وقتك ثواني

انطيني من وقتك ثواني

ما أكلك آني وآني

شاعر من أهل العراق

عربي وأصلي عدناني

قريشي ومن نسل قحطان

لا تركي ولا مدغوش بأفغاني

لك الزمان ابيوم ذر الناس

الزمان عليك ذرّاني

وأخذ يردف علي ضرباته باليافوخ

لحد ما حيل خَوّاني

لكن بي طبع ما طيح

روح اسأل عليّ واشهودي عدواني

مو انسان يحجي وياك

جرح يمشي عله طوله وشمعه بصواني

ما عندي لجوء ايجتف الانسان

ولا مربوط بلساني

وك استاتس عندي من عمان

وسياسي... كوفي اعنان سمّاني

عراقي آني

من زاخو لعد الفاو عنواني

دجله أمي....وأبوي اسمه الفرات

وليلي مرجاني

عمت عين الزمان اشلون ذَبّاني

ولو حز ابضميري الجوع

بس ما غير ألواني

إيخسه التاريخ إذا مو باول أحروفه

يحط اسم العراق ويشطب الثاني

عراقي آني البكلبي على الساني

آنه الماصحت يوم أحاه

وعلى امتوني تكطع صوت سجاني

وأظن ما قصريت أوياه

أخويه الجان ينخاني

يِأَشِّر بيده من ابعيد

جديم الكوم يلكاني

عطش مره... شلت نهر الفرات وجيت

وشفت دجله على الجولان يتناني

عراقي آنه

واليبيعن سكاير على الرصيف اليوم نسواني

والماتوا بحسرة علبة حليب اطفال

هذوله أطفال خُوّاني

ما آغَنّي بعد بلاد العرب أوطاني

من الشام لبغدانِ

ومن نجد الى يمنٍ

الى مصر فتطوانِ

عراقي آني

ولو تعرفني كل الناس بس أعطيك برهاني

من داروا عليّ عرب آخر زمان وحتى جيراني

ما هزوا وحك عيناك

شعره من شعرات وجداني

عراقي آني

التأقلم

تأقلم قال لي البطران وتوكل على الله وصفّي النية

عيش لذاتك ويا الناس وانس همومك شوية

مهي الدنيا صارت هيك كل من منزوي له وخاتل بفيه

ولا تذكر فراتك يوم ولا دجلة وشواطيها

بدّّّلهن بنهر الراين المعروف وفروعه ومجاريه

وخلنا من الوطن هسع وقصوره ومحاريه

بدله بوطن نيدر لاند وسوشاله ومصاريه

وخلنا من الطفولة وعمرك التعبان وسنينه ومحاكيه

هي الناس نفس الناس بس تختلف باللهجات والنية

إذا رايد صديق هنا بدل روب بعطية

وإذا رايد تشم نسمة عليله من هوى بغداد هوانا بأند هوفن ينعش الريه

وإذا رايد قهقه وعشرة دفو نسوان بدل مارغريت بجهرة بهية

وإذا حنيت لاغاني داخل حسن والمنكوب ورياض أحمد يغني محمداوي بطور الابوذية

أنا اللي ياويل ياويلاه والهوسات ومحاضن الجوبية

اسمع مايكل شيقول من أوتار صوته تطق تراجيّه

وإذا يردح على المسرح أظن يمرد كلاويّه

عليمن تنقهر عالفات مهيّ الدنيا مقضية

عليمن للصبح سهران قاعد بس تعد نجوم تحسب زحل وثريا

وطننا اللي بنيناه بدمع وضلوع صفى ببطن الحراميه

وعليمن عينك ربيّه قطعنا الياس من عندهم بعد فدنوب لا روحه ولا جيه

أتاقلم وأنا الممنون ياخايب غصباً عليّ

أتاقلم واجيك من الصبح بالشورت حافي بطرق رجليّا

واذب عقالي ذاك الزين واحط براسي طاقيه

وأروح الديسكو كل يوم وأرقص لك رقص مذبوح وأقلك شوفني ايش بيّا

أتأقلم وأصيحن حيل تحيا الديمقراطية